top of page
搜尋
  • 作家相片TAXIGO

TAMA TAXI Code Red

TAMA TAXI 的士古:Code Red
醉到坐唔穩嘅年輕人話自己唔會嘔,結果一地都係,最後邊個洗車?

凌晨 0100 入場接機,未夠 12 點,已紥馬太子搵順路旗。

不求東涌,但求葵青荃,都贏半程,唔使跑單腳。

一停車,右邊一對 brother 搭晒膊頭揮手。

睇真啲,企唔穩嘅, Code Red!

想鎖門,但又想搏係咪葵青荃......

猶豫一秒,立即後悔。

鬈毛甲推咗個企唔穩嘅鬈毛丙上嚟,佢即刻打橫瞓咗喺後座。

甲:使唔使畀個膠袋你先呀?

丙:唔使......

我:嘩!乜唔使呀?你講到咁,你即刻搵個膠袋畀佢先!

丙:唔使呀!我啱啱嘔完咋.......

我:嘔完唔可以再嘔㗎?

丙:唔會呀......整污糟咗我畀返錢你啦!

我:呢個唔係錢嘅問題.......

但無錢係一個問題,所以我好大問題。

因為我唔只無錢,仲爭人好多錢。

賤輝話齋,廿零個啦!

有無啲教盧覓雪跳打拳舞嘅外快 job 介紹畀我幫補吓?

為生活,我可以忍......

我:你整污糟咗要洗返架車!

丙:得得得......

去白石角!

都成百五、六蚊,我搏!

沿路特別揸得定,驚 chok 親老細。

一路安全,直到獅子山隧道口.....

後座咇咇聲響!

Code Red!!

我:喂!咩事呀?你做乜除咗條安全帶呀?

撞鏡見佢打橫瞓咗喺度。

我:喂!你唔好呀?你坐直扣返條安全帶先,如果唔係會一直響。

佢一扣好,就嘩啦嘩啦嘩啦......

我屌!

聽聲已知出咗事,連鏡都唔敢望。

開窗,熄冷氣,連抖氣都唔敢,呼吸有害。

全條獅子山隧道都祈禱唔好有第二嘢。

好彩無。

大圍出,轉入世界花園路,停定,落車。

經過後座都唔敢望,背住去尾廂,摷晒啲嘢出嚟,終於搵到個膠袋,喺後座遞畀佢。

丙:唔好意思呀......

我:唔使唔好意思呀!未完㗎!你揸住個膠袋先,我驚你陸續有嚟。

上車,U-turn 上返獅子山公路,沿路直飛白石角。

創新路公廁,停車,熄匙,落地。

丙:唔係呢度喎......

我:我梗係知唔係呢度啦,但呢度係你學識咩係負責任嘅地方。

開尾門,攞水涌毛巾,擺車門邊,然後企幾丈遠。

我:嗱,你而家同我抹返乾淨架車先,你上車嗰陣我講咗㗎!我唔係要你錢,我要你抹返乾淨架車!但唔好畀我見到嗰啲嘢呀!我會嘔埋一份,仲嘔落你個身度㗎!你唔好行埋嚟呀!

我真係會嘔埋一份㗎。

天生異稟。

丙:但我好暈呀......

我:呢個唔關我事,你整污糟我架車,你洗返佢係你嘅責任。

佢呢個狀態,要行路返去都要廿零分鐘。

我企五六個車位後,一路睇住佢抹。

嘩啦嘩啦嘩啦嘩啦嘩啦嘩啦!

嘩!佢老闆,佢一路抹,一路嘔!

何其壯觀!

好彩佢識嘔落地。

擾攘 10 分鐘,佢終於話抹完。

佢將毛巾拎畀我。

我:喂,你唔係嘛,我車你嚟公廁,畀埋水桶你,係要你攞水洗乾淨,洗,係要用水㗎!

丙:我真係好暈呀!你放過我啦,我畀返錢你啦!

又講錢!

呢期最鍾意人同我講錢。

佢孭返個背囊準備行,我一睇,成個背囊都係麵條!

唉......後生仔。

搵搵搵搵,竟然搵到一包未開垃圾膠袋。

揸呢架車個司機真神奇,叮噹咁樣,乜都有嘅!

但就唔擺司機位囉!

終於,開咗個垃圾袋,畀佢袋起個背囊,都要搞成分鐘。

丙:咁我係咪呢度行返去呀?

我:你行到咩?上車啦!仲有鬼人坐我部車咩!成陣味......

送到佢樓下,佢畀張 $500 過嚟:唔好意思呀!唔使找嘞。

我:唔係我要求你畀,但你畀我又受得起。

畀錢買教瞓咪呢啲囉。

丙:係呀.....唔好意思呀。

我:返去瞓啦!

返轉頭去公廁,再親手由內洗到外,噴好多清新劑,終於感覺安全。

仲有時間入機場。


TAMA TAXI

20240414

0 次查看0 則留言

最新文章

查看全部

Comments


bottom of page