跟大佬不如揸的士
夜，某屋邨的士站，頭位。
一行約十個少年，跟隨一凶神惡煞大佬格在車前擾攘。
前後兩架的士經過，大佬揮手截停，指揮少年上車。
大：你幾個，跟我上呢架！你幾個，後面嗰架！
咁我呢？當我死㗎？
的士站喎！頭位喎！
平時仇家都唔會同你講江湖規矩，生意淡泊，更加當你臭四！
我有修養，唔同你計較。
仲有三個賣剩蔗，一臉惘然。
大：你幾個，上呢架！
指揮有序，呢啲咪大佬囉。
開門迎蔗。
甲：真係去呀？我得十蚊咋！
乙：我十蚊都無呀！
丙：唔撚係呀.....
咁點呀？我畀囉！
三個吱吱唚，聽內容，應該跟大佬去刮友。
我：去邊。
丙：XX邨，巴士站。
落錶，準備開車。
甲：不如咪撚去啦.....
丙：咁你去同佢講囉。
我停車：係咪去？
幾個年輕人，搭幾十蚊的士都話無錢，仲話刮友？
跟咩大佬吖？跟我揸的士，咪大好前途囉！
丙：司機，跟住前面架車。
條路你自己揀。
丙：司機，幾耐到？
我：就講就到。
幾分鐘車，仲見到前面兩個仇家尾燈。
丙：司機，喺前面架車後面停。
你唔講，我都知。
你無錢畀點算？大嗱嗱幾十蚊。
我：$34.2，$34 得嘞。
兩毫子，拮串魚蛋都 lam lam 脷啦！
開門，甲乙跳車。
你哋唔係走吖嘛？
丙：等等......
丙落車，呢個時候梗係搵大佬。
大：你幾條友唔係幾十蚊都無呀嘛？
你咁講好似你有咁喎......
大佬轉頭問：你哋有無錢？畀住先！
妖！大佬......
十幾人，幾十蚊車都要籌旗？
我車你返屋企食飯，回頭是岸啦好嘛！
送客，又排的士站，老三。
開 Zello 同左手講呢單嘢。
左手：呢啲咪跟錯大佬囉！
排隊，無嘢做，喺 facebook 寫呢篇嘢。
寫到呢到，又頭位。
媽咪抱住 BB 上車：唔該屯門！
大支嘢，梗係做生意先。
半個鐘，到站。
我：$254.1，$250 得嘞。
媽咪：唔該師傅，拜拜。
停埋一邊，開返個 facebook。
啲字呢？去咗邊？
去咗食消夜呀？
乜撚都無晒！
唔撚係呀？
仆街吖.......
開 Telegram，重頭寫過。
完。
原來未完。
剛貼完文，TAMA TAXI 出支屯門出城。
幾分鐘到。
等客中......
跟我揸的士，前途一片光明。
==============
原作者：的士高
刊載處：的士夠格
↻↺↻↺↻↺↻↺
已出之文，如已播之種，有其生命，我不阻止它如何發展，但請尊重生命，轉貼請勿刪此信息。