微雨的深宵，域多利道，撞鬼容易撞人難。
放低客，回頭去瑪麗。
經迴旋處轉向沙宣道上斜，左邊行人路赫見一細路蹣跚上行。
細路？這時候？
減慢車速，駛至其身旁，原來是個子矮小女生。
我看著她，她看著我。
她受不住誘惑，揮手要了車。
我：去哪？
女生：先向石塘咀那邊走，行嗎？
我說：石湖墟都可以，只要妳喜歡。
她有點緊張，我盡量讓她輕鬆點。
她擠出微笑，上身挨前，用手扶著椅側。
我：妳咁夜返學呀？幾多年班？
聽得出，這次笑得較真。
我：妳本來諗住行路返去呀？凌晨兩點幾喎？
由沙宣道經搏扶林道去石塘咀，說長不算長，但凌晨加上一個女孩，就有點淒涼。
她有點窘，收起笑容：你陣間可唔可以喺去般咸道天橋前放低我？
我：妳唔係去石塘咀咩？
女生：係......不過我應該唔夠錢，我響嗰度行落去得嘞......
我：哦.....咁樣.....咁都啱嘅.....
過了香港大學巴士站，轉了左彎，我：係咪呢度呀？
女生：係.....
我：吓？唔係呀？
繼續行，第三街。
我：係咪呢度？
女生：過咗嘞......
我：咩話？又唔係呢度？
繼續行，廣豐里。
我：仲唔係呢度？
她哭笑不得。
過了火井，接近石塘咀街市，我說：應該係呢度啦啩？
她點頭，問：幾多錢？
我：三千蚊啦！
她：吓？
我：點呀？無錢畀呀？無錢畀咪落車囉。
她眼有淚光。
我：妳再唔落車我車妳返我屋企。
她哽咽，我拉掣開門送客。
我：畀心機讀書。
TAMA TAXI
20190626
Comments