應援大媽
送客浩景臺，無人駕駛有支 repeat order，西九龍上車，10 分鐘射程範圍， 接下。 未駛出閘口，唔夠 5 秒來電，乖。 大家要學。 女人：黃絲傅，我喺邊度上車好呀？ 我：最好梗係喺我呢度啦....... 女人：吓？咩話？ 應該係個腦未 load 到，唔識畀反應。 我：你係咪西九呀？好似得一個地方方便上車咋喎。 女人：唔係西九文化中心呀！西九龍中心呀！ 輪到我未 load 到、西九、西九龍……ic。 我：咁不如行兩步去長沙灣道政府合署個的士上落客位吖，方便啲。 女人：好呀！我而家過去。 未報時，已收線。 東京街轉荔枝角道去欽州街，唔使 5 分鐘，三個師奶已等緊。 師奶甲：多謝你嚟車我呀！幾驚 call 唔到呀！ 感覺上呢程車會好熱鬧。 師奶甲：我哋要先去九龍灣喎，之後先入將軍澳。 我：好呀，你鍾意遊車河都得。 師奶甲：做乜而家無咗中途站既？ 佢意思係落 order 時唔使寫中途站，只揀有定無。 我：聽台長講，話唔想司機睇住中途站揀 order 喎....... 扮到好委屈。 師奶甲：好呀！我支持呀！ 我：有咩好呀？ 師奶甲：我唔使打咁多字吖嘛！哈哈！ 原來係咁....... 然後幾個師奶開始開 show。 bilibala......bilibala.......bilibala........ 師奶甲：咦？你聽咩歌呀？C AllStar？ 有料喎...... 師奶甲：有無 mirror？我要聽 mirror！ 嗯.......傳說中的大媽？ 忍唔住望吓倒後鏡，睇到興奮兩個字。 我：你又真係恨到，今日呢架車真係有喎！ 今日架車，就係上次港島去九叔、有貼紙嗰架車。 篤返個 menu，搵返 mirror。 嘩！姜濤呀姜濤呀！正呀正呀正呀！大聲啲大聲啲！ 好似嗌緊大力啲！大力啲......... 我都係周杰倫吖，你顧吓我感受好喎！ 我：係咪真係咁 high 呀？ 師奶：直情係潮熱添呀！ .................. 我：你係咪會去追星架？ 師奶：咩呀！應援大媽咪我哋囉！ 我：吓？應援？應援？應援？ 咩嚟架？我直接同援交拉上關係。 援交大媽？咁爆？真係日新月異........... 然後車廂一直開 mini mirror concert....... 都總好過bilibala......bilibala.......bilibala........既。 九龍灣擺低兩件，剩返師奶甲，佢繼續享受緊 mirror，好好味咁........ 由姜濤到 Anson Lo 再到 Edan 又 Lokman，好似都畀佢食過晒咁。 到將軍澳，佢教我點樣 u turn 掉頭。 師奶甲：好，幾錢呀？ 撳錶加埋隧道費，$151.3。 我：$150。 師奶甲：咁平既咩？ 我：我覺得好貴喎。 師奶甲：明明見到 $150 幾蚊架！ 我：幻覺嚟既啫！ 師奶甲：吖！你個死嘢吖......... 我：你個應援大媽吖......... 收完 $150，開電門送客。 竟然擺低 $50 即跳車：幻覺吖嗱！畀你食飯！ 喂！除安全帶、開門，已經見佢笑住跑咗去........ 你個應援大媽吖！ 教我如何不愛 TAMA 的客？ #的士夠格 #mirror #應援 #頂你個肺搵張mirror相呃吓like先
==============
原作者：的士高
刊載處：的士夠格
↻↺↻↺↻↺↻↺
已出之文，如已播之種，有其生命，我不阻止它如何發展，但請尊重生命，轉貼請勿刪此信息。