Lonely Christmas
踩完早更，凌晨又接更。
一上車想收工，又輾轉被街客拉出旺角......
諗起聽日要踩特更，很灰。
旺角道、金魚街落客。
平時長龍位，竟然得一隻，墳頭五座，順推隊尾跟機。
未幾，迎面一女一男越過頭車，敲我門。
我開窗：前面......有......車.....喎。
就算遇過幾許豐乳，仍然被其女伴巨胸嚇到口窒。
男：我想坐你呢架喎。
新款混能車貴租有原因，原來仲有福利。
你想？大晒呀？我有原則㗎！
拉尾門唔啱㗎......頭車好難受㗎！
邊個開咗我隻電門？
我：去邊？
我無話畀你哋上車喎！
男人：XXX。
返我屋企嗰度。
喂！咁我點拒絕你呀？！
拒載係唔啱㗎！
香港人最叻係咩？能屈能伸、靈活變通。
又唔係正式艇站...…
閃電搵到藉口說服自己放低原則。
閂門，開車。
車往前駛，眼向後望。
妳對波真係好大。
嗱！唔係我講㗎！
男人講咗我諗緊嗰句。
睇嚟佢同我一樣，第一次見識呢個震撼彈。
女人：使唔使咁直接呀？同你唔熟㗎喎！
男人：就係唔熟先要直接。
嗱，呢啲 moment，講邏輯真係無用，最緊要 keep talking，溝女要學。
究竟，有幾大呢？
我諗起 Rocky 喺拳館玩嗰啲吊掛速度球......
啪啪啪啪啪啪啪..…..聲嗰啲呢！
條女都應該知遮唔到、遮都無用，索性開放北半球。
嗰條渠......好危險......細路仔真係唔好喺渠道玩.......
女：你住邊幢呀？未撞過你嘅？
男：俾妳撞一嘢我瞓低咗啦，妳咁大......
男人賤起上嚟，可以好賤。
女：你好賤呀！
但音調反映咗妳幾受。
男：我住屯門㗎！
撞過妳我食咗妳啦！
呢句我心諗嘅。
女：吓？咁你又嗌走？
男：咁妳走吖嘛。
女：你唔係咁進取呀嘛？
男：係呀！點知幾時有機會？
有料。
女：咁點呀？跟住你再返屯門呀？
喂…...唔好呀！我想收工。
男：睇吓點啦......
女：睇咩呀？
梗係睇妳啦！天才！
男：睇妳囉！
See!
女：關我咩事呀？
男：唔好玩啦，溝緊妳嘛！
溝ing......推測兩人應該在剛才某場合首遇。
脂粉客一定係，至於姣婆......
女：溝咩？你知我實無仔㗎嗱？
男：如果有仔，畀妳著到咁樣拋頭露面，飛咗佢啦！
女面有難色：咩拋頭露面啫？我有咩問題呀？
後生仔即係後生仔，係急咗啲。
女人，未出世至一百歲，都唔鍾意人批評其衣著外表。
大好形勢急轉直下，女人氣牆之轉變，彌漫車廂之中。
睇人仆街真係最開心。
男：我問咗阿 Fi 啦，佢話你無仔。
女：佢話無就無呀？佢又唔係我。
係囉係囉，睇你仲有咩招數。
Dead Air.......
喂！唔好輸呀！我幫你打氣呀！夜媽媽我唔想去屯門呀！
男：阿 Fi 話妳都問佢我有無女囉......
嘩嘩嘩嘩嘩嘩！姣婆呀！
女：你講嘢呀？我邊有問呀？
即場踢爆叫人點落台呀？
女：點解我要畀你溝先？
問就輸啦！
男：聖誕吖嘛......
女：關聖誕咩事呀？你當我聖誕禮物呀？
Bo....Bo....Boxing Day 吖嘛。
男：聖誕 lonely 吖嘛。
XDDDDD
女：你窿啫，我唔窿喎。
男：我就係想唔窿囉......
女：去叫雞囉！
男：喂！我乖仔嚟㗎！我唔叫雞㗎！
女：你講嘢呀？成晚昅到實，你唔鹹濕？
男：鹹濕還鹹濕，叫雞還叫雞，兩回事嚟嘅，唔好搞亂。
女：咁你當我雞呀？
男：梗係唔係啦！我認真㗎......
女：我點知呀？
男：妳試吓咪知囉..….
女：點試呀？你當我試用裝呀？
男：梗係唔係啦！掉返轉，我係試用裝，妳試我吖嘛......
XDDDDDDD
喂，快啲啦，就到嘞......
我都戥你心急。
男：傾吓偈，認識吓先囉。
女：我返屋企喎.....
男：我送妳囉。
係囉係囉，一齊落車啦！
繼續拉拉扯扯......終於到站。
我轉頭：到嘞......其實......
六隻眼望住我。
我：其實我唔想去屯門。
男：係呀！我都唔想返住。
女：是但你，我落車。
喂！妳跳車？
仲彈彈吓添？
男：喂......妳真係返屋企呀？
女：好撚凍呀！唔返去邊呀？
梗係啦！好似無衫著咁，陰功......
男人好似唔識反應咁。
我：喂，條女笑呀！畀錢落車啦！
兩舊，唔使找。
男：我好暖㗎，使唔使試吓？
女：咪咁狼啦你！
嗱，有女溝，有仔溝，我又有工收，幾好？
Merry Christmas.
==============
原作者：的士高
刊載處：的士夠格
↻↺↻↺↻↺↻↺
已出之文，如已播之種，有其生命，我不阻止它如何發展，但請尊重生命，轉貼請勿刪此信息。