• TAXIGO

Joe Le Taxi


又一個夜,上海街,一女揮手要車,停下,門半開。

她問:香港,北角,和富道,去不去?

我答:妳搭,我去。

門閂上,酒氣襲背而來,鏡中打量,醉娃一個。

途上,她問:點解你揸的士唔揸 Uber ?

我說:點解你唔問揸 Uber 嘅唔揸的士?

她說:Uber 好的士好多。

我問:咁妳又搭的士?

她說:因為我無得揀,Uber 無車。

我說:哦,Uber 好過的士係因為無車。

她說:其實我好撚憎你啲的士佬。

我說:多謝。

她說:你知唔知點解?

我說:願聞其詳。

其實,不說也知,都是那些事。

她說:啲的士佬,態度好撚差,我試過好撚多次,開門問佢過唔過海,佢話:唔過!成撚日都係咁。

我說:點解妳問?搭的士,拉門,坐上車,講去邊,佢唔去,咪坐響架車度唔走,其他乜都唔使講㗎,咪修吓甲、捽吓腳趾咁.......

她驚訝:乜可以咁嘅咩?

我詫異:咁盡量唔好捽腳趾。但佢唔開車,你係有權唔落車,點解要放棄?

她說:互相尊重啫......

我說:佢都無尊重妳。

她說:咦,你又啱喎.....

話匣子打開,一發不可收拾,然後她又說起某次酒醉坐的士的事,再然後我開始識驚了。

某次她又酒醉,又是搭的士,又跟司機交談,但不知說到了些甚麼,記不起來,因為斷了片,只知後來被車了去差館,那次,她很火,最有趣是在家醒來後完全忘記發生甚麼事,就是電話不翼而飛,但有個阿 sir 打電話畀佢話佢知漏低咗個電話響差館,她才記起去過差館。

我好奇:妳個電話響佢度,但佢打電話畀妳,話妳知嗰電話響佢度......會不會太詭異?

突破盲腸。

她笑:係喎.......我都無電話.....佢點打電話畀我呢.....?

說著笑著,到了北角。

她說:估唔到你又真係識嚟呢度喎....

我問:還憎的士佬嗎?

她說:憎呀,不過你好好喎。

我說:客氣。

她問:幾錢?

看看收費錶,我說:$101.8。

她放下 $100,然後說:不用找。

我說:多謝,妳還可以走路回家嗎?

她手從後抱過來,問:你有無卡片?

我說:沒有。

她扁嘴:咁咪想溝你都唔得囉?

我說:有緣再說。

她看看收費錶:其實幾多錢?

我說:$100。

她說:原來我畀少咗你呀?

我說:無,妳畀咗啲快樂我,無價。

她又說:想溝你都唔得......

看她跌撞著走到閘門前,我拐個彎,又等著另一個故事。

==============

原作者:的士高

刊載處:的士夠格

↻↺↻↺↻↺↻↺

已出之文,如已播之種,有其生命,我不阻止它如何發展,但請尊重生命,轉貼請勿刪此信息。

#的士 #的士高 #的士夠格 #Taxi #TaxiGo #的士佬 #搭的士 #夜更的士 #uber #拒載 #唔過海

21 次查看1 則留言

最新文章

查看全部