• TAXIGO

尋開心


2019,619,仍是那個沒馬跑星期三晚。

近兩句鐘逃不出將軍結界,畀三蚊轉移陣地,出觀塘果然起死回生。

兩點,銅鑼灣道覓孤魂,遠遠兩女揮手,慢駛鎖門戒備,飲到斜斜地還好打扮斯文,好,車妳。

主動開門迎賓,黑衣女即推白衣女上車再閂門轉頭即撇。

弊,中計。

轉身開房燈,樣子不及早前將軍澳中心那個奪魄銷魂,但甜美怡人,屬妹妹系美人。

一如所料,上車即瞓。

我:小姐,不如你先講去邊再瞓。

妹妹只懂微笑。

大鑊。

我:靚女,夠鐘起身返工....

妹:吓?做咩.....?

我:妳住邊度?

妹:唔好意思.....唔好意思....

又瞓.....

好不容易問到地址,香港仔。

記得某次又是醉娃,住樂華,坐副駕駛座,瞓了半個鐘要女警協助,還好挨在我膊頭,這個坐後座,無著數,死人唔畀佢瞓,搵偈傾。

妹:唔好意思......唔好意思......

我:妳冷靜啲。

妹:唔好意思,我唔想咁㗎....你可唔可以開返盞燈?

都好,光啲無咁易瞓。

堅拿度天橋。

妹:唔好意思.....唔好意思.....

她一直講唔好意思,一直在翻手袋,我開始覺得事情不妙。

我:點樣?妳無帶錢?

妹:唔好音思,唔好意思.....我有㗎....我有㗎.....你可唔可以開盞燈畀我搵.....?

我:妳想開幾多盞燈?

我指指房燈,她哈哈哈地傻笑。

我都忍不住笑。

香港仔隧道。

妹:唔好意思......唔好意思.....我得一百蚊.....唔好意思,陣間去到你跟我上樓,我畀錢你.....

我:吓?上樓?妳飲到咁醉,咁我咪好危險?

她又哈哈哈哈地笑。

妹:唔係呀......我.....我唔想唔畀錢,一係你畀你電話我,聽日畀返你.....

我:妳係咪飲親酒都咁可愛?

她又哈哈哈哈地笑。

妹:你玩我.....

我:妳有誠意就得㗎嘞,誠意可以解決到好多問題。

妹:吓?乜可以咁㗎?即係我可以唔使畀錢?

我:唔係咁意思,而係如果只係爭少少,咁咪由佢囉。

收費亭。

妹:唔係呀,我唔想唔畀錢.....你而家車我去邊?

暈.....

我:返屋企囉。

妹:你知我住邊咩?

我:知。次次都係我車妳返嚟㗎啦,妳唔記得咗嘞?

她又笑。

終於,到樓下。

我:嗱,睇吓,七十幾蚊之嘛,一百蚊有找。

妹:太好嘞......

她伸出手:nice to meet you.

終於有身體接觸。

她搖搖晃晃走著,看大門口前有樓梯,我等著。

果然。她一上樓梯就跌倒。

開車門,過去做男人應做的事。

將她抱起,她將手放在我頸後......

妹:唔該你送我返嚟....

一鬆懈,她就有機可乘。

臉頰撞嘴唇,加上近距離接觸。

我贈你體溫,你贈我興奮.....

妹:你送埋我上樓呀?

我:我收好貴㗎。

她又哈哈哈哈.....

Okay, Stop.

一吻之後,之後都是我的幻想。

==============

原作者:的士高

刊載處:的士夠格

↻↺↻↺↻↺↻↺

已出之文,如已播之種,有其生命,我不阻止它如何發展,但請尊重生命,轉貼請勿刪此信息。

#的士 #的士高 #的士夠格 #Taxi #TaxiGo #的士佬 #搭的士 #夜更的士

24 次查看0 則留言